ᠲᠤᠰ ᠰᠠᠷᠠ ᠶᠢᠨ 24 ᠦ ᠡᠳᠦᠷ᠂ ᠶᠠᠫᠣᠨ ᠠᠮᠧᠷᠢᠺᠠ ᠠᠤᠰᠲ᠋ᠠᠷᠯᠢᠶᠠ ᠡᠨᠡᠳᠬᠡᠭ ᠳᠦᠷᠪᠡᠨ ᠤᠯᠤᠰ ᠤᠨ ᠲᠡᠷᠢᠭᠦᠨ ᠦ ᠠᠭᠤᠯᠵᠠᠯᠲᠠ ᠲᠣᠣᠺᠢᠣ᠋ ᠳᠤ ᠪᠣᠯᠣᠭᠰᠠᠨ ᠢ ᠲᠣᠬᠢᠶᠠᠯᠳᠤᠭᠤᠯᠤᠨ᠂ ᠬᠢᠲᠠᠳ ᠤᠨ ᠺᠣᠮᠮᠦᠨᠢᠰᠲ ᠵᠠᠰᠠᠭ ᠤᠨ ᠲᠦᠷᠢᠮᠡᠬᠡᠢᠯᠡᠬᠦ᠂ ᠬᠡᠯᠮᠡᠭᠳᠡᠭᠦᠯᠬᠦ᠂ ᠤᠰᠠᠳᠬᠠᠬᠤ ᠪᠣᠳᠤᠯᠭᠠ ᠳᠤ ᠥᠪᠡᠷᠰᠡᠳ ᠦᠨ ᠪᠦᠬᠦ ᠵᠦᠢᠯ ᠢᠶᠡᠨ ᠠᠯᠳᠠᠵᠤ ᠪᠣᠢ ᠡᠮᠦᠨᠡᠲᠦ ᠮᠣᠩᠭᠣᠯ᠂ ᠲᠥᠪᠡᠳ᠂ ᠣᠢᠭᠤᠷ ᠵᠢᠴᠢ ᠰᠡᠭᠦᠯ ᠦᠨ ᠵᠢᠯ ᠳᠦ ᠡᠷᠬᠡ ᠴᠢᠯᠦᠭᠡ ᠪᠡᠨ ᠬᠠᠰᠤᠭᠤᠯᠤᠭᠰᠠᠨ ᠠᠴᠠ ᠠᠳᠠᠯᠢᠬᠠᠨ ᠵᠣᠪᠠᠯᠠᠩ ᠳᠤ ᠦᠷᠲᠦᠵᠦ ᠡᠬᠢᠯᠡᠭᠰᠡᠨ ᠬᠣᠩᠺᠣᠩ ᠵᠡᠷᠭᠡ ᠭᠠᠵᠠᠷ ᠤᠨ ᠬᠡᠰᠡᠭ ᠲᠥᠯᠥᠭᠡᠯᠡᠭᠴᠢᠳ ᠫᠠᠷᠯᠠᠮᠧᠨᠲ ᠤᠨ ᠬᠣᠶᠠᠳᠤᠭᠠᠷ ᠠᠰᠠᠷ ᠤᠨ ᠡᠮᠦᠨᠡ ᠴᠤᠭᠯᠠᠷᠠᠨ᠂ ᠬᠢᠲᠠᠳ ᠤᠨ ᠺᠣᠮᠮᠦᠨᠢᠰᠲ ᠵᠠᠰᠠᠭ ᠤᠨ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠳᠦ ᠠᠪᠴᠤ ᠪᠠᠢᠭᠠ ᠤᠰᠠᠳᠬᠠᠬᠤ ᠪᠣᠳᠣᠯᠭᠠ ᠶᠢ ᠪᠣᠷᠣᠭᠣᠰᠢᠶᠠᠨ᠂ ᠭᠠᠳᠠᠭᠰᠢ ᠬᠦᠴᠦ ᠪᠡᠷ ᠦᠷᠭᠡᠳᠬᠡᠨ ᠲᠡᠯᠡᠬᠦ ᠪᠣᠳᠤᠯᠭᠠ ᠶᠢᠨ ᠬᠢᠨᠢ ᠬᠠᠰᠢᠯᠭᠠ ᠪᠣᠯᠣᠭᠠᠴᠢ ᠡ ᠭᠡᠵᠦ ᠶᠠᠭ ᠰᠠᠢᠬᠠᠨ ᠠᠭᠤᠯᠵᠠᠯᠲᠠ ᠬᠢᠵᠦ ᠪᠠᠢᠭᠠ ᠳᠦᠷᠪᠡᠨ ᠤᠯᠤᠰ ᠤᠨ ᠲᠡᠷᠢᠭᠦᠨ ᠳᠦ ᠬᠦᠰᠡᠨ ᠤᠷᠢᠶᠠᠯᠠᠵᠠᠢ᠃
ᠶᠠᠫᠣᠨ᠂ ᠠᠮᠧᠷᠢᠺᠠ᠂ ᠠᠤᠰᠲ᠋ᠠᠷᠯᠢᠶᠠ᠂ ᠡᠨᠡᠳᠬᠡᠭ ᠳᠦᠷᠪᠡᠨ ᠤᠯᠤᠰ ᠤᠨ ᠠᠭᠤᠯᠵᠠᠯᠲᠠ ᠶᠢ ᠺᠤᠸᠠᠳ᠋ （ Quadrilateral Security Dialogue ） ᠭᠡᠵᠦ ᠳᠦᠭᠦᠮᠴᠢᠯᠡᠨ ᠨᠡᠷᠡᠯᠡᠳᠡᠭ ᠪᠦᠭᠡᠳ ᠡᠨᠡᠳᠬᠡᠭ ᠨᠣᠮᠤᠬᠠᠨ ᠳᠠᠯᠠᠢ ᠶᠢᠨ ᠣᠷᠣᠨ ᠤ ᠭᠣᠣᠯ ᠪᠣᠯᠬᠤ ᠳᠦᠷᠪᠡᠨ ᠠᠷᠠᠳᠴᠢᠯᠠᠭᠰᠠᠨ ᠤᠯᠤᠰ ᠤᠨ ᠬᠣᠯᠪᠤᠭᠠ ᠪᠣᠯᠬᠤ ᠶᠤᠮ᠃ ᠭᠣᠣᠯᠳᠠᠭᠤ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠ᠂ ᠪᠠᠲᠤᠯᠠᠨ ᠬᠠᠮᠠᠭᠠᠯᠠᠯᠲᠠ ᠶᠢᠨ ᠲᠠᠯᠠ ᠪᠠᠷ ᠬᠠᠮᠲᠤᠷᠠᠨ ᠠᠵᠢᠯᠯᠠᠬᠤ᠂ ᠬᠠᠷᠢᠯᠴᠠᠨ ᠬᠠᠪᠰᠤᠷᠠᠯᠴᠠᠬᠤ ᠤᠴᠢᠷ ᠤᠳ ᠢᠶᠠᠨ ᠵᠥᠪᠳᠡᠯᠴᠡᠬᠦ ᠪᠣᠯᠪᠠᠴᠤ᠂ ᠡᠭᠦᠨ ᠡᠴᠡ ᠪᠡᠨ ᠭᠠᠳᠠᠨᠠ ᠪᠠᠰᠠ ᠲᠤᠰ ᠣᠷᠣᠨ ᠨᠤᠭᠤᠳ ᠲᠠᠬᠢ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠ᠂ ᠲᠸᠷᠣᠷᠢᠰᠲ ᠤᠨ ᠡᠰᠡᠷᠭᠦ ᠪᠣᠳᠤᠯᠭᠠ᠂ ᠢᠨᠲ᠋ᠧᠷᠨᠧᠲ ᠣᠷᠴᠢᠨ ᠤ ᠠᠶᠤᠯ ᠦᠭᠡᠢ ᠪᠠᠢᠳᠠᠯ᠂ ᠺᠣᠷᠣᠨᠠ ᠸᠢᠷᠦ᠋ᠰ ᠲᠦ ᠠᠪᠬᠤ ᠪᠣᠳᠤᠯᠭᠠ᠂ ᠠᠭᠤᠷ ᠠᠮᠢᠰᠬᠤᠯ ᠤᠨ ᠬᠣᠪᠢᠷᠠᠯᠲᠠ ᠳᠤ ᠠᠪᠬᠤ ᠪᠣᠳᠣᠯᠭᠠ ᠵᠡᠷᠭᠡ ᠣᠯᠠᠨ ᠲᠠᠯᠠ ᠳᠤ ᠰᠠᠨᠠᠯ ᠢᠶᠠᠨ ᠰᠣᠯᠢᠯᠴᠠᠨ ᠵᠥᠪᠳᠡᠯᠴᠡᠳᠡᠭ ᠠᠵᠠᠢ᠃ ᠣᠳᠣ ᠪᠣᠯᠲᠠᠯᠠ 4 ᠤᠳᠠᠭᠠ ᠬᠤᠷᠠᠯᠳᠤᠵᠤ ᠪᠠᠢᠭᠠ ᠪᠦᠭᠡᠳ ᠲᠤᠰ ᠤᠳᠠᠭᠠ ᠲᠡᠷᠢᠭᠦᠨ ᠨᠦᠭᠥᠳ ᠦᠨ ᠠᠭᠤᠯᠵᠠᠯᠲᠠ ᠨᠢ ᠶᠠᠫᠣᠨ ᠤᠯᠤᠰ ᠲᠤ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠳᠠᠵᠤ᠂ ᠭᠣᠣᠯᠳᠠᠭᠣ ᠰᠡᠭᠦᠯ ᠦᠨ ᠵᠢᠯ ᠦᠳ ᠲᠡᠬᠢ ᠬᠢᠲᠠᠳ ᠤᠨ ᠬᠦᠴᠦ ᠪᠡᠷ ᠭᠠᠳᠠᠭᠰᠢ ᠲᠦᠷᠢᠬᠦ ᠭᠡᠰᠡᠨ ᠣᠷᠤᠯᠳᠤᠯᠭᠠ ᠳᠤ ᠠᠪᠬᠤ ᠪᠣᠳᠤᠯᠭᠠ ᠪᠠᠨ ᠶᠠᠷᠢᠯᠴᠠᠵᠠᠢ᠃
ᠣᠢᠷᠠ ᠳᠤ ᠪᠣᠯᠵᠤ ᠪᠠᠢᠭᠠ ᠣᠷᠣᠰ ᠦᠨ ᠦᠺᠷᠠᠢᠨ ᠵᠦᠭ ᠴᠡᠷᠢᠭ ᠢᠶᠡᠷ ᠲᠦᠷᠢᠮᠡᠬᠡᠢᠯᠡᠬᠦ ᠠᠵᠢᠯᠯᠠᠭᠠ ᠨᠢ ᠪᠦᠬᠦ ᠳᠡᠯᠡᠬᠡᠢ ᠶᠢᠨ ᠠᠩᠬᠠᠷᠤᠯ ᠤᠨ ᠬᠠᠯᠠᠭᠤᠨ ᠴᠡᠭ ᠪᠣᠯᠵᠤ᠂ ᠣᠯᠠᠨ ᠤᠯᠤᠰ ᠣᠷᠣᠨ ᠤ ᠪᠤᠷᠤᠭᠤᠰᠢᠶᠠᠯ ᠢ ᠬᠦᠷᠲᠡᠵᠦ ᠪᠣᠢ ᠳᠤᠮᠳᠠ᠂ ᠬᠢᠲᠠᠳ ᠤᠨ ᠤᠯᠤᠰ ᠤᠨ ᠳᠤᠲᠤᠭᠠᠳᠤ ᠳᠠᠭᠠᠨ ᠪᠣᠰᠣᠳ ᠦᠨᠳᠦᠰᠦᠲᠡᠨ ᠨᠦᠭᠥᠳ ᠢ ᠤᠰᠠᠳᠬᠠᠨ ᠬᠠᠢᠯᠠᠭᠤᠯᠬᠤ ᠭᠢᠨᠣᠴᠢᠳ᠋ ᠠᠵᠢᠯᠯᠠᠭᠠ᠂ ᠵᠢᠴᠢ ᠬᠦᠴᠦ ᠪᠡᠷ ᠭᠠᠳᠠᠭᠰᠢ ᠲᠦᠷᠢᠨ ᠦᠷᠭᠡᠳᠬᠡᠬᠦ ᠪᠣᠳᠤᠯᠭᠠ ᠨᠢ ᠬᠠᠷᠢᠨ ᠣᠷᠣᠰ ᠦᠺᠷᠠᠢᠨ ᠤ ᠳᠠᠢᠨ ᠤ ᠭᠠᠯ ᠳᠤ ᠬᠠᠯᠬᠠᠯᠠᠭᠳᠠᠬᠤ ᠪᠠᠢᠳᠠᠯ ᠲᠠᠢ ᠪᠣᠯᠵᠤ ᠢᠷᠡᠭᠰᠡᠨ ᠪᠠᠢᠨᠠ᠃ ᠭᠡᠪᠡᠴᠤ ᠬᠢᠲᠠᠳ ᠤᠨ ᠺᠣᠷᠣᠨᠠ ᠸᠢᠷᠦ᠋ᠰ ᠤᠨ ᠬᠣᠣᠷ ᠤᠷᠰᠢᠭ ᠠᠴᠠ ᠪᠣᠯᠵᠤ ᠪᠣᠢ ᠠᠵᠤ ᠠᠬᠤᠢ ᠶᠢᠨ ᠵᠡᠷᠭᠡ ᠣᠯᠠᠨ ᠲᠠᠯᠠ ᠳᠤ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠬᠢᠮᠤᠷᠠᠯ ᠳᠤ ᠤᠴᠠᠷᠠᠵᠤ ᠪᠠᠢᠬᠤ ᠨᠢ ᠲᠣᠳᠤᠷᠬᠠᠢ ᠪᠦᠭᠡᠳ ᠳᠠᠯᠳᠠᠭᠤᠷ ᠣᠷᠣᠰ ᠢ ᠳᠡᠮᠵᠢᠵᠦ᠂ ᠥᠪᠡᠷᠰᠡᠳ ᠤᠨ ᠬᠦᠴᠦ ᠪᠡᠷ ᠲᠦᠷᠢᠨ ᠥᠷᠭᠡᠳᠬᠡᠬᠦ ᠠᠵᠢᠯᠯᠠᠭᠠ ᠪᠡᠨ ᠶᠣᠰᠣᠨ ᠳᠤ ᠨᠡᠢᠴᠡᠭᠰᠡᠨ ᠠᠵᠢᠯᠯᠠᠭᠠ ᠪᠣᠯᠭᠠᠬᠤ ᠭᠡᠵᠦ ᠣᠷᠣᠯᠳᠤᠬᠤ ᠬᠣᠷᠣᠨ ᠰᠠᠨᠠᠭᠠ ᠨᠢ ᠬᠠᠷᠢᠨ ᠨᠢᠭᠤᠪᠠᠴᠤ ᠨᠢᠷᠤᠭᠤ ᠨᠢ ᠢᠯᠡ ᠭᠡᠳᠡᠭ ᠬᠡᠷᠡᠭ ᠪᠣᠯᠵᠤ ᠪᠣᠢ᠃ ᠶᠠᠭ ᠡᠢᠮᠦᠷᠬᠦ ᠡᠭᠡᠵᠡᠭᠲᠡᠢ ᠦᠶᠡ᠂ ᠺᠣᠸᠠᠳ᠋ ᠨᠢ ᠶᠠᠫᠣᠨ ᠳᠤ ᠴᠠᠭ ᠢᠶᠠᠨ ᠣᠯᠵᠤ ᠬᠤᠷᠠᠯᠳᠤᠭᠰᠠᠨ ᠠᠵᠠᠢ᠃
ᠳᠥᠷᠪᠡᠨ ᠤᠯᠤᠰ ᠤᠨ ᠲᠡᠷᠢᠭᠦᠨ ᠦ ᠬᠤᠷᠠᠯ ᠨᠢ 24 ᠦ ᠡᠳᠦᠷ ᠪᠠᠷᠤᠭ ᠪᠦᠬᠦᠯᠢ ᠡᠳᠦᠷᠵᠢᠨ ᠢᠶᠡᠨ ᠬᠤᠷᠠᠯᠳᠤᠭᠰᠠᠨ ᠪᠦᠭᠡᠳ ᠬᠠᠮᠲᠤ ᠶᠢᠨ ᠢᠯᠡᠷᠬᠡᠢᠯᠡᠯᠲᠡ ᠨᠡᠢᠲᠡᠯᠡᠵᠡᠢ᠃
ᠬᠠᠷᠢᠨ ᠫᠠᠷᠯᠠᠮᠸᠨᠲ ᠤᠨ ᠠᠰᠠᠷ ᠤᠨ ᠡᠮᠦᠨᠡᠬᠢ ᠴᠤᠭᠯᠠᠭᠠᠨ ᠢ ᠡᠨᠡᠳᠬᠡᠭ ᠦᠨ Republic ᠲᠸᠯᠸᠢᠰ᠂ Wion ᠲᠸᠯᠸᠢᠰ᠂ Times India ᠲᠧᠯᠸᠢᠰ ᠵᠡᠷᠭᠡ ᠮᠸᠳᠢᠶᠠ ᠨᠤᠭᠤᠳ ᠰᠤᠷᠪᠤᠯᠵᠢᠯᠠᠵᠤ ᠪᠠᠢᠵᠠᠢ ( https://www.youtube.com/watch?v=sTK1MFBrPAw )᠃
ᠲᠤᠯᠭᠠ ᠮᠡᠳᠡᠭᠡᠯᠡᠪᠡ
2022 ᠣᠨ ᠤ 5 ᠰᠠᠷᠠ 26 ᠶᠢᠨ ᠡᠳᠦᠷ
