ᠴᠠᠭ ᠦᠶᠡ ᠶᠢᠨ ᠪᠣᠱᠣᠭ᠄ ᠰᠠᠨᠠᠭᠠᠴᠢᠯᠠᠭᠠ ᠶᠢᠨ ᠪᠢᠴᠢᠭ
ᠴᠠᠭ ᠦᠶᠡ ᠶᠢᠨ ᠪᠣᠱᠣᠭ᠄ ᠰᠠᠨᠠᠭᠠᠴᠢᠯᠠᠭᠠ ᠶᠢᠨ ᠪᠢᠴᠢᠭ
ᠡᠯᠢᠭᠡ ᠨᠢᠭᠡᠲᠦ ᠡᠮᠦᠨᠡᠲᠦ ᠮᠣᠩᠭᠣᠯᠴᠤᠳ ᠡ︕
ᠬᠢᠲᠠᠳ ᠤᠨ ᠺᠣᠮᠮᠦᠨᠢᠰᠲ ᠨᠠᠮ ᠤᠨ ᠳᠠᠷᠤᠯᠠᠯ ᠬᠡᠴᠡᠭᠦᠳᠡᠭᠰᠡᠭᠡᠷ᠂ ᠮᠣᠩᠭᠣᠯᠴᠤᠳ ᠪᠢᠳᠡᠨ ᠢ ᠬᠡᠯᠡ ᠰᠣᠶᠣᠯ ᠤᠨ ᠲᠠᠯᠠ ᠠᠢᠮᠠᠭᠯᠠᠨ ᠤᠰᠠᠳᠬᠠᠬᠤ ᠱᠠᠲᠣᠨ ᠳᠤ ᠰᠢᠯᠵᠢᠨ ᠣᠷᠣᠯᠠ᠃ ᠲᠤᠰ ᠨᠠᠮ ᠤᠨ ᠦᠨᠳᠦᠰᠦᠲᠡᠨ ᠦ ᠪᠣᠳᠣᠯᠭᠠ<< ᠵᠥᠪ ᠭᠣᠯᠳᠤᠷᠢᠯ>> ᠢᠶᠡᠨ ᠠᠬᠢᠨ ᠣᠯᠵᠤ᠂ ᠮᠣᠩᠭᠣᠯᠴᠤᠳ ᠲᠤ ᠵᠥᠭᠡᠯᠡᠨ ᠢᠶᠡᠷ ᠬᠠᠨᠲᠤᠬᠤ ᠪᠣᠯᠬᠣ ᠪᠣᠢ ᠭᠡᠳᠡᠭ ᠭᠣᠷᠢᠳᠠᠯᠭᠠ ᠪᠦᠷᠢᠮᠦᠰᠦᠨ ᠲᠠᠰᠤᠷᠠᠯᠠ᠃ ᠥᠩᠭᠡᠷᠡᠭᠰᠡᠨ ᠵᠠᠭᠤᠭᠠᠳ ᠵᠢᠯ ᠦᠨ ᠲᠤᠷᠰᠢ᠂ ᠡᠮᠦᠨᠡᠲᠦ ᠮᠣᠩᠭᠣᠯᠴᠤᠳ ᠡᠷᠬᠡ ᠴᠢᠯᠦᠭᠡᠨ ᠦ ᠪᠡᠨ ᠲᠥᠯᠥᠭᠡ ᠲᠡᠮᠡᠴᠡᠭᠡᠳ ᠴᠤ᠂<< ᠥᠪᠡᠷ ᠢᠶᠡᠨ ᠵᠠᠰᠠᠬᠤ>> ᠭᠡᠳᠡᠭ ᠵᠠᠮ ᠢᠶᠠᠷ ᠨᠢ ᠠᠷᠭᠠ ᠦᠭᠡᠢ ᠶᠢᠨ ᠡᠷᠬᠡᠨ ᠳᠦ ᠶᠠᠪᠤᠵᠤ ᠦᠵᠡᠭᠡᠳ ᠴᠤ᠂ ᠦᠢ ᠣᠯᠠᠨ ᠰᠢᠯᠢᠳᠡᠭ ᠬᠦᠮᠦᠰ ᠦᠨ ᠢᠶᠡᠨ ᠠᠮᠢ ᠨᠠᠰᠤ ᠶᠢ ᠦᠷᠡᠭᠳᠡᠭᠦᠯᠵᠦ᠂ ᠬᠢᠲᠠᠳ ᠬᠡᠯᠡ ᠰᠣᠶᠣᠯ ᠳᠤ ᠠᠭᠤᠰᠬᠤ᠂ ᠰᠣᠶᠣᠯ ᠤᠨ ᠥᠪ ᠳᠤᠷᠠᠰᠬᠠᠯ ᠲᠠᠯᠬᠢᠭᠳᠠᠨ ᠰᠦᠢᠳᠬᠦ᠂ ᠮᠣᠩᠭᠣᠯᠴᠤᠳ ᠤᠨ ᠣᠷᠣᠰᠢᠨ ᠠᠮᠢᠳᠤᠷᠠᠬᠤ ᠭᠠᠵᠠᠷ ᠨᠤᠲᠤᠭ ᠢᠪᠴᠤᠷᠠᠬᠤ᠂ ᠪᠠᠢᠭᠠᠯᠢ ᠣᠷᠴᠢᠨ ᠰᠦᠢᠷᠡᠬᠦ᠂ ᠮᠣᠩᠭᠣᠯ ᠬᠦᠮᠦᠨ ᠠᠮᠠ ᠬᠠᠷᠢᠴᠠᠩᠭᠤᠢ ᠲᠦᠪᠯᠡᠷᠡᠭᠰᠡᠨ ᠴᠡᠭ ᠦᠳ ᠶᠠᠪᠤᠬᠤ ᠲᠣᠰᠣᠮ ᠴᠥᠬᠡᠷᠡᠬᠦ᠂ ᠪᠠᠭᠠᠰᠬᠤ᠂ ᠬᠢᠲᠠᠳ ᠬᠦᠮᠦᠨ ᠠᠮᠠ ᠶᠢᠨ ᠰᠢᠬᠠᠯᠲᠠ᠂ ᠵᠡᠷᠯᠢᠭ ᠪᠠᠯᠠᠮᠠᠳ ᠳᠡᠭᠡᠷᠡᠯᠬᠡᠯ ᠤᠨ ᠳᠣᠣᠷᠠ ᠦᠨᠳᠦᠰᠦᠲᠡᠨ ᠦ ᠣᠨᠴᠠᠯᠢᠭ ᠢᠶᠠᠨ ᠠᠯᠳᠠᠬᠤ ᠬᠤᠪᠢ ᠵᠠᠶᠠᠭᠠ ᠠᠴᠠ ᠮᠣᠯᠲᠣᠷᠠᠭᠠ ᠦᠭᠡᠢ᠃ ᠡᠨᠡ ᠵᠠᠭᠤᠭᠠᠳ ᠵᠢᠯ ᠦᠨ ᠢᠶᠡᠨ ᠲᠡᠦᠬᠡ ᠶᠢ ᠬᠦᠷᠲᠡᠯᠡ ᠬᠢᠲᠠᠳ ᠤᠨ ᠺᠣᠮᠮᠦᠨᠢᠰᠲ ᠨᠠᠮ ᠤᠨ ᠠᠯᠪᠠᠳᠠᠯᠭᠠ ᠪᠠᠷ ᠭᠠᠵᠢᠭᠤᠳᠠᠭᠤᠯᠵᠤ ᠭᠣᠢᠪᠢᠭᠤᠯᠵᠤ ᠪᠢᠴᠢᠭᠰᠡᠭᠡᠷ᠂ ᠬᠣᠢᠴᠢ ᠦᠶᠡ ᠶᠢᠨ ᠬᠢᠨ ᠮᠠᠨᠢ ᠬᠠᠭᠤᠷᠮᠠᠭ ᠲᠡᠦᠬᠡᠨ ᠳᠦ ᠢᠲᠡᠭᠡᠵᠦ᠂ ᠮᠣᠩᠬᠠᠷᠠᠵᠤ ᠶᠠᠪᠤᠬᠤ ᠳᠤ ᠬᠦᠷᠦᠯᠡ᠃ ᠮᠣᠩᠭᠣᠯ ᠢᠶᠠᠷ ᠬᠢᠴᠢᠶᠡᠯᠯᠡᠳᠡᠭ ᠨᠡᠷᠡ ᠲᠡᠢ ᠪᠠᠢᠭᠰᠠᠨ ᠴᠠᠭ ᠲᠤ ᠴᠤ ᠮᠣᠩᠭᠣᠯ ᠬᠡᠯᠡ ᠡᠪᠳᠡᠷᠡᠯ ᠳᠦ ᠣᠷᠣᠭᠠᠳ ᠪᠠᠢᠭᠰᠠᠨ ᠪᠣᠯ᠂ ᠡᠳᠦᠭᠡ ᠮᠣᠩᠭᠣᠯ ᠢᠶᠠᠷ ᠬᠢᠴᠢᠶᠡᠯᠯᠡᠬᠦ᠂ ᠮᠣᠩᠭᠣᠯ ᠬᠡᠯᠡ ᠪᠡᠷ ᠬᠡᠪᠯᠡᠯ ᠮᠡᠳᠡᠭᠡᠯᠡᠯ ᠭᠠᠷᠭᠠᠬᠤ᠂ ᠣᠯᠠᠭᠤᠯᠠ ᠴᠤᠭᠯᠠᠷᠠᠵᠤ ᠮᠣᠩᠭᠣᠯ ᠬᠡᠯᠡ ᠪᠡᠷ ᠶᠠᠷᠢᠯᠴᠠᠬᠤ ᠶᠢ ᠴᠤ ᠬᠣᠷᠢᠭᠯᠠᠵᠤ ᠡᠬᠢᠯᠡᠯᠡ᠃ ᠡᠭᠦᠪᠡᠷ ᠵᠣᠭᠰᠤᠬᠤ ᠦᠭᠡᠢ᠂<< ᠥᠪᠡᠷ ᠢᠶᠡᠨ ᠵᠠᠰᠠᠬᠤ ᠣᠷᠣᠨ>> ᠭᠡᠭᠴᠢ ᠶᠢ ᠬᠡᠰᠡᠭᠯᠡᠯᠨ ᠪᠤᠲᠠᠯᠠᠬᠤ᠂ ᠪᠦᠷᠢᠮᠦᠰᠦᠨ ᠴᠤᠴᠠᠯᠠᠬᠤ᠂ ᠮᠠᠯ ᠠᠵᠤ ᠠᠬᠤᠢ᠂ ᠭᠠᠵᠠᠷ ᠲᠠᠷᠢᠶᠠᠯᠠᠩ ᠡᠷᠬᠢᠯᠡᠳᠡᠭ ᠮᠣᠩᠭᠣᠯᠴᠤᠳ ᠢ ᠨᠤᠲᠤᠭ ᠪᠡᠯᠴᠢᠭᠡᠷ᠂ ᠭᠠᠵᠠᠷ ᠲᠠᠷᠢᠶᠠ ᠠᠴᠠ ᠨᠢ ᠰᠠᠯᠭᠠᠬᠤ᠂ ᠬᠦᠮᠦᠨ ᠠᠮᠠ ᠶᠢ ᠬᠢᠲᠠᠳᠴᠤᠳ ᠢᠶᠠᠷ ᠤᠯᠠᠮ ᠴᠢᠨᠠᠭᠤᠰᠢᠲᠠ ᠰᠢᠩᠭᠡᠷᠡᠭᠦᠯᠦᠨ ᠠᠭᠤᠰᠬᠠᠬᠤ ᠠᠯᠬᠤᠮ ᠠᠷᠤ ᠠᠷᠤ ᠠᠴᠠ ᠪᠠᠨ ᠬᠢᠭᠳᠡᠬᠦ ᠨᠢ ᠨᠢᠭᠡᠨᠲᠡ ᠲᠣᠳᠣᠷᠬᠠᠢ ᠪᠣᠯᠵᠠᠢ᠃ ᠮᠣᠩᠭᠣᠯ ᠤᠳᠤᠮ ᠲᠠᠢ ᠬᠦᠮᠦᠨ ᠪᠦᠬᠦᠨ( ᠮᠣᠩᠭᠣᠯ ᠢᠶᠠᠷ ᠶᠠᠷᠢᠳᠠᠭ ᠬᠢᠲᠠᠳ ᠢᠶᠠᠷ ᠶᠠᠷᠢᠳᠠᠭ ᠢᠯᠭᠠᠭᠠ ᠦᠭᠡᠢ) ᠴᠠᠭᠳᠠᠭᠠ ᠶᠢᠨ ᠪᠠᠢᠩᠭᠤ ᠶᠢᠨ ᠬᠢᠨᠠᠯᠲᠠ ᠳᠤ ᠪᠠᠢᠳᠠᠭ ᠪᠣᠯᠪᠠ᠃
ᠪᠢᠳᠡ ᠣᠳᠣ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠤᠢ︖ ᠬᠡᠯᠡ ᠡᠴᠡ ᠪᠡᠨ ᠰᠠᠯᠪᠠᠯ ᠡᠮᠦᠨᠡᠲᠦ ᠮᠣᠩᠭᠣᠯ ᠶᠠᠭᠤ ᠪᠣᠯᠬᠤ ᠪᠢᠯᠡ︖ ᠦᠨᠳᠦᠰᠦᠲᠡᠨ ᠮᠦᠬᠦᠬᠦ ᠠᠶᠤᠯ ᠰᠢᠭᠤᠳ ᠨᠢᠭᠤᠷᠯᠠᠭᠰᠠᠨ ᠨᠦᠭᠦᠴᠡᠯ ᠳᠦ᠂ ᠬᠤᠪᠢ ᠲᠠᠪᠢᠠᠯᠩ ᠤᠨ ᠢᠶᠠᠨ ᠲᠤᠬᠠᠢ ᠪᠣᠳᠣᠬᠤ ᠦᠭᠡᠢ᠂ ᠶᠠᠷᠢᠯᠴᠠᠬᠤ ᠦᠭᠡᠢ᠂ ᠭᠠᠷᠴᠠ ᠬᠠᠢᠬᠤ ᠦᠭᠡᠢ᠂ ᠭᠤᠲᠤᠷᠠᠵᠤ ᠭᠤᠨᠢᠭᠠᠳ᠂ ᠭᠠᠰᠠᠯᠵᠤ ᠬᠠᠷᠠᠮᠰᠠᠭᠠᠳ ᠯᠠ᠂ ᠭᠠᠷ ᠢᠶᠠᠨ ᠨᠤᠬᠤᠯᠠᠵᠤ ᠰᠠᠭᠤᠬᠤ ᠦᠦ︖ ᠭᠠᠳᠠᠭᠠᠳᠤ ᠶᠢᠨ ᠳᠡᠮᠵᠢᠯᠭᠡ ᠶᠢ ᠬᠤᠭᠤᠴᠠᠭᠠ ᠬᠢᠵᠠᠭᠠᠷ ᠦᠭᠡᠢ ᠬᠦᠯᠢᠶᠡᠵᠦ ᠬᠡᠪᠲᠡᠬᠦ ᠦᠦ︖ ᠸᠢᠴᠠᠲ ᠮᠡᠲᠦ ᠶᠢᠨ ᠬᠠᠷᠢᠴᠠᠭᠠᠨ ᠤ ᠬᠡᠷᠡᠭᠰᠡᠯ ᠢᠶᠡᠷ ᠢᠬᠢᠷ ᠰᠢᠬᠢᠷ ᠵᠦᠢᠯ ᠢᠶᠡᠷ ᠵᠤᠭᠠᠯᠠᠵᠤ᠂ ᠮᠠᠷᠭᠤᠵᠤ ᠮᠡᠳᠬᠡᠬᠦ᠂ ᠭᠠᠴᠠᠭᠠᠨ ᠤ ᠪᠠᠨ ᠬᠢᠲᠠᠳ ᠱᠣᠢᠰᠢᠭ ᠡᠮᠡᠰ ᠦᠨ ᠬᠡᠷᠡᠭᠦᠯ ᠬᠢᠬᠦ ᠮᠠᠶ᠋ᠢᠭ ᠢᠶᠠᠷ ᠡᠳᠦᠷ ᠬᠣᠨᠣᠭ ᠢ ᠨᠥᠭᠴᠢᠭᠡᠭᠰᠡᠭᠡᠷ ᠪᠠᠢᠬᠤ ᠦᠦ︖ ᠳᠠᠢᠰᠤᠨ ᠬᠡᠳᠦᠢ ᠬᠦᠴᠦᠷᠬᠡᠭ ᠪᠣᠯᠪᠠᠴᠤ᠂ ᠴᠠᠭ ᠤᠨ ᠪᠠᠢᠳᠠᠯ ᠥᠭᠡᠷᠡᠲᠡᠵᠦ ᠪᠠᠢᠭᠠ᠂ ᠵᠠᠷᠢᠮ ᠲᠣᠮᠣ ᠭᠦᠷᠦᠨ ᠦ ᠳᠠᠷᠤᠩᠭᠤᠢᠯᠠᠬᠤ ᠦᠵᠡᠯ ᠦᠨ ᠨᠥᠯᠥᠭᠡ ᠨᠢ ᠮᠠᠨ ᠰᠢᠭ᠋ ᠡᠷᠬᠡ ᠴᠢᠯᠦᠭᠡ ᠦᠭᠡᠢ ᠠᠷᠠᠳ ᠲᠦᠮᠡᠨ ᠪᠠᠢᠲᠤᠭᠠᠢ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠭᠰᠠᠨ ᠤᠯᠤᠰ ᠣᠷᠣᠨ ᠨᠤᠭᠤᠳ ᠢ ᠬᠦᠷᠲᠡᠯᠡ ᠰᠦᠷᠳᠡᠭᠦᠯᠬᠦ ᠪᠣᠯᠣᠭᠰᠠᠨ ᠢᠶᠠᠷ᠂ ᠲᠡᠭᠦᠨ ᠦ ᠡᠰᠡᠷᠭᠦ ᠨᠢᠭᠡᠳᠦᠨ ᠲᠡᠮᠡᠴᠡᠬᠦ ᠶᠢ ᠬᠡᠵᠢᠶᠡ ᠬᠡᠵᠢᠶᠡᠨ ᠡᠴᠡ ᠢᠯᠡᠭᠦᠦ ᠴᠢᠬᠤᠯᠠᠴᠢᠯᠠᠵᠤ ᠪᠠᠢᠨᠠ᠃ ᠪᠢᠳᠡ ᠣᠳᠤ ᠶᠢᠨ ᠡᠴᠡ ᠪᠡᠨ ᠠᠷᠠᠢ ᠳᠡᠭᠡᠭᠦᠷ ᠲᠦᠪᠰᠢᠨ ᠳᠦ᠂ ᠠᠵᠢᠯ ᠬᠡᠷᠡᠭᠴᠢ ᠪᠡᠷ ᠰᠡᠳᠬᠢᠵᠦ᠂ ᠪᠣᠯᠣᠮᠵᠢ ᠶᠢᠨ ᠳᠣᠲᠤᠷᠠᠬᠢ ᠵᠦᠢᠯ ᠢ ᠬᠢᠬᠦ᠂ ᠢᠳᠡᠪᠬᠢᠲᠡᠢ ᠬᠢᠬᠦ ᠶᠢ ᠪᠣᠳᠣᠬᠤ ᠴᠠᠭ ᠪᠣᠯᠣᠭᠰᠠᠨ ᠰᠢᠦ᠃ ᠶᠠᠭᠤᠨ ᠤ ᠡᠮᠦᠨᠡ᠂ ᠳᠠᠭᠤ ᠬᠣᠭᠣᠯᠠᠢ ᠪᠠᠨ ᠠᠪᠤᠯᠴᠠᠵᠤ ᠰᠠᠨᠠᠯ ᠪᠣᠳᠣᠯ ᠢᠶᠠᠷ ᠢᠶᠠᠨ ᠨᠢᠭᠡᠳᠬᠦ ᠬᠡᠷᠡᠭᠲᠡᠢ᠃
ᠰᠡᠭᠦᠯ ᠦᠨ ᠭᠤᠴᠢᠭᠠᠳ ᠵᠢᠯ ᠳᠦ᠂ᠡᠮᠦᠨᠡᠲᠦ ᠮᠣᠩᠭᠣᠯ ᠤᠨ ᠲᠡᠮᠡᠴᠡᠭᠴᠢ ᠬᠦᠮᠦᠰ ᠭᠠᠳᠠᠭᠠᠳᠤ ᠳᠤ ᠭᠠᠷᠴᠤ᠂ ᠡᠮᠦᠨᠡᠲᠦ ᠮᠣᠩᠭᠣᠯ ᠤᠨ ᠢᠶᠠᠨ ᠠᠬᠤᠢ ᠪᠠᠢᠳᠠᠯ ᠂ ᠬᠦᠮᠦᠰ ᠦᠨ ᠢᠶᠡᠨ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠢ ᠳᠡᠯᠡᠬᠡᠢ ᠨᠡᠢᠲᠡ ᠶᠢᠨ ᠰᠣᠨᠣᠷ ᠲᠤ ᠬᠦᠷᠭᠡᠬᠦ ᠲᠠᠯᠠ ᠪᠠᠷ ᠪᠠᠭᠠ ᠦᠭᠡᠢ ᠬᠦᠴᠦᠨ ᠴᠢᠷᠮᠠᠢᠯᠲᠠ ᠭᠠᠷᠭᠠᠭᠰᠠᠨ᠂ ᠡᠳᠦᠭᠡ ᠠᠷᠠᠳᠴᠢᠯᠠᠭᠰᠠᠨ ᠤᠯᠤᠰ ᠤᠳ ᠲᠤ ᠠᠵᠢᠯᠯᠠᠵᠤ ᠠᠮᠢᠳᠤᠷᠠᠵᠤ ᠪᠤᠢ ᠡᠮᠦᠨᠡᠲᠦ ᠮᠣᠩᠭᠣᠯᠴᠤᠳ ᠬᠢᠲᠠᠳ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠲᠤ ᠲᠠᠰᠤᠷᠠᠯᠲᠠ ᠦᠭᠡᠢ ᠡᠰᠡᠷᠭᠦᠴᠡᠯ ᠲᠠᠯᠪᠢᠵᠤ᠂ ᠨᠤᠲᠤᠭ ᠨᠢᠭᠡᠲᠡᠨ ᠢᠶᠡᠨ ᠳᠡᠮᠵᠢᠭᠰᠡᠭᠡᠷ ᠪᠠᠢᠨᠠ᠃
ᠡᠮᠦᠨᠡᠲᠦ ᠮᠣᠩᠭᠣᠯᠴᠤᠳ ᠤᠨ ᠬᠣᠭᠣᠷᠣᠨᠳᠤ ᠶᠠᠷᠢᠶᠠ ᠬᠡᠯᠡᠯᠴᠡᠭᠡ ᠥᠷᠨᠢᠭᠦᠯᠬᠦ᠂ ᠰᠠᠨᠠᠯ ᠪᠣᠳᠣᠯ ᠢᠶᠠᠨ ᠪᠠᠢᠩᠭᠤ ᠰᠣᠯᠢᠯᠴᠠᠬᠤ᠂ ᠭᠠᠳᠠᠭᠠᠳᠤ ᠠᠴᠠ ᠤᠷᠢᠶᠠᠯᠠᠨ ᠳᠠᠭᠤᠳᠠᠬᠤ᠂ ᠤᠬᠠᠭᠤᠯᠤᠨ ᠰᠤᠷᠲᠠᠯᠴᠢᠯᠠᠬᠤ ᠪᠠᠭᠠᠵᠢ ᠬᠡᠷᠡᠭᠰᠡᠯ᠂ ᠲᠠᠪᠴᠠᠩ ᠲᠤᠲᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠢ ᠳᠠᠷᠤᠢᠬᠠᠨ ᠥᠭᠡᠷᠡᠴᠢᠯᠡᠬᠦ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂<< ᠦᠨᠳᠦᠰᠦᠨ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠ>> ᠬᠢᠬᠦ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠲᠡᠭᠦᠨ ᠦ ᠬᠠᠮᠤᠭ ᠤᠨ ᠳᠦᠭᠦᠮᠬᠡᠮ ᠬᠡᠯᠪᠡᠷᠢ ᠨᠢ᠂ ᠴᠠᠬᠢᠮ ᠰᠦᠯᠵᠢᠶᠡ ᠪᠣᠶᠣWEBSAIT ᠢ ᠡᠷᠴᠢᠮᠲᠡᠢ ᠠᠰᠢᠭᠯᠠᠬᠤ ᠶᠠᠪᠤᠳᠠᠯ ᠶᠤᠮ᠃ ᠮᠡᠳᠡᠭᠡᠵᠢ᠂ ᠨᠡᠢᠭᠡᠮ ᠦᠨ ᠬᠠᠷᠢᠯᠴᠠᠭᠠᠨ ᠤ᠂ ᠮᠡᠳᠡᠭᠡᠯᠡᠯ ᠦᠨ ᠪᠦᠬᠦ ᠬᠡᠷᠡᠭᠰᠡᠯ ᠢ ᠢᠳᠡᠪᠬᠢᠲᠡᠢ ᠠᠰᠢᠭᠯᠠᠬᠤ ᠯᠠ ᠶᠣᠰᠤᠲᠠᠢ᠃ ᠰᠦᠯᠵᠢᠶᠡ ᠶᠢᠨ ᠬᠤᠪᠢ ᠳᠤ᠂ ᠠᠩᠭ᠍ᠯᠢ᠂ ᠬᠢᠲᠠᠳ ᠬᠡᠯᠡ ᠪᠡᠷ᠂ ᠯᠠᠲ᠋ᠢᠨ᠂ ᠺᠢᠷᠢᠯ ᠪᠢᠴᠢᠭ ᠢᠶᠡᠷ ᠳᠤᠮᠳᠠᠳᠤ ᠤᠯᠤᠰ ᠠᠴᠠ ᠪᠣᠰᠣᠳ ᠭᠠᠵᠠᠷ ᠲᠤ ᠪᠣᠰᠣᠭ ᠭᠠᠵᠠᠷ ᠲᠤ ᠬᠢᠬᠦ ᠳᠦ ᠶᠠᠮᠠᠷ ᠴᠤ ᠪᠡᠷᠬᠡᠰᠢᠶᠡᠯ ᠠᠯᠭᠠ ᠪᠣᠯᠪᠠᠴᠤ᠂ ᠡᠮᠦᠨᠡᠲᠦ ᠮᠣᠩᠭᠣᠯᠴᠤᠳ ᠲᠤ ᠵᠣᠷᠢᠭᠤᠯᠤᠭᠰᠠᠨ ᠮᠣᠩᠭᠣᠯ ᠪᠢᠴᠢᠭ ᠦᠨ ᠰᠦᠯᠵᠢᠶᠡ ᠵᠣᠬᠢᠶᠠᠬᠤ ᠳᠤ ᠲᠸᠭᠡᠨᠣᠯᠣᠭᠢ ᠶᠢᠨ ᠭᠡᠬᠦ ᠮᠡᠲᠦ ᠠᠰᠠᠭᠤᠳᠠᠯ ᠲᠤᠯᠭᠠᠷᠠᠳᠠᠭ ᠲᠠᠯᠠ ᠪᠤᠢ ᠨᠢ ᠦᠨᠡᠨ᠃ ᠭᠡᠪᠡᠴᠦ᠂ ᠣᠳᠣ ᠶᠢᠨ ᠮᠣᠩᠭᠣᠯ ᠪᠢᠴᠢᠭ ᠦᠨ ᠰᠦᠯᠵᠢᠶᠡ ᠬᠢᠵᠦ ᠪᠤᠢ ᠠᠷᠭᠠ ᠪᠠᠷ ᠲᠦᠯᠦᠪᠯᠡᠵᠦ ᠵᠣᠬᠢᠶᠠᠭᠠᠳ᠂ ᠦᠢᠯᠡᠴᠢᠯᠡᠭᠦᠷ ᠢ ᠨᠢ ᠭᠠᠳᠠᠭᠠᠳᠤ ᠳᠤ ᠪᠠᠢᠷᠢᠯᠠᠭᠤᠯᠴᠢᠬᠠᠪᠠᠯ᠂ ᠠᠵᠢᠯ ᠢᠶᠠᠨ ᠬᠢᠵᠦ ᠪᠣᠯᠣᠨᠠ᠃ ᠮᠣᠩᠭᠣᠯ ᠪᠢᠴᠢᠭ ᠦᠨ ᠰᠦᠯᠵᠢᠶᠡᠨ ᠦ ᠪᠡᠨ ᠰᠠᠭᠤᠷᠢᠨ ᠳᠡᠭᠡᠷᠡ᠂ ᠬᠢᠲᠠᠳ᠂ ᠠᠩᠭ᠍ᠯᠢ᠂ ᠶᠠᠫᠣᠨ᠂ ᠣᠷᠣᠰ ᠬᠡᠯᠡᠨ ᠦ᠂ ᠺᠢᠷᠢᠯ᠂ ᠯᠠᠲ᠋ᠢᠨ ᠪᠢᠴᠢᠭ ᠦᠨ ᠬᠤᠪᠢᠯᠪᠤᠷᠢ ᠤᠶᠠᠯᠳᠤᠭᠤᠯᠪᠠᠯ᠂ ᠮᠣᠩᠭᠣᠯᠴᠤᠳ ᠬᠣᠭᠣᠷᠤᠨᠳᠤ ᠪᠠᠨ ᠰᠠᠨᠠᠯ ᠪᠣᠳᠣᠯ᠂ ᠮᠡᠳᠡᠭᠡᠯᠡᠯ ᠢᠶᠡᠨ ᠰᠣᠯᠢᠯᠴᠠᠵᠤ ᠪᠣᠯᠬᠣ ᠪᠠ ᠳᠡᠯᠡᠬᠡᠢ ᠨᠡᠢᠲᠡ ᠳᠦ ᠮᠡᠳᠡᠭᠡᠯᠡᠯ ᠬᠦᠷᠭᠡᠬᠦ ᠳᠦ ᠳᠦᠭᠦᠮᠬᠡᠮ ᠦᠵᠡᠭᠦᠯᠦᠨᠡ᠃ ᠡᠨᠡ ᠲᠠᠯᠠ ᠳᠡᠭᠡᠷᠡ᠂ ᠭᠠᠳᠠᠭᠠᠳᠤ ᠳᠤ ᠪᠠᠢᠭᠠ ᠪᠢᠳᠡ ᠪᠦᠬᠦᠨ᠂ ᠢᠯᠠᠩᠭᠤᠶᠠ ᠣᠯᠠᠨ ᠨᠡᠢᠲᠡ ᠳᠦ ᠨᠡᠷᠡ ᠨᠥᠯᠥᠭᠡ ᠲᠡᠢ ᠪᠣᠯᠣᠭᠰᠠᠨ ᠪᠠᠢᠭᠤᠯᠤᠯᠭᠠ( ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ)᠂ ᠬᠣᠪᠢ ᠬᠦᠮᠦᠨ ᠬᠠᠮᠲᠤᠷᠠᠵᠤ ᠤᠷᠢᠶᠠᠯᠠᠨ ᠳᠠᠭᠤᠳᠠᠪᠠᠯ᠂ ᠳᠡᠮᠵᠢᠨ ᠣᠷᠣᠯᠴᠠᠬᠤ ᠬᠦᠴᠦᠨ ᠳᠤᠲᠠᠬᠤ ᠦᠭᠡᠢ᠃ ᠮᠣᠩᠭᠣᠯ ᠰᠦᠯᠵᠢᠶᠡ ᠪᠣᠢ ᠪᠣᠯᠵᠤ᠂ ᠡᠮᠦᠨᠡᠲᠦ ᠮᠣᠩᠭᠣᠯ ᠳᠤ ᠪᠠᠨ ᠪᠠᠢᠭᠠ ᠠᠬᠠᠨ ᠳᠡᠭᠦᠦᠰ ᠮᠠᠨᠢ<< ᠬᠡᠷᠡᠮ ᠳᠠᠪᠠᠬᠤ>> ᠠᠷᠭᠠ ᠪᠠᠷ ᠲᠡᠭᠦᠨ ᠳᠡᠬᠡᠨ ᠬᠣᠯᠪᠣᠭᠳᠠᠨ ᠡᠬᠢᠯᠡᠪᠡᠯ᠂ ᠪᠢᠳᠡ ᠰᠦᠯᠵᠢᠶᠡ ᠪᠡᠷ ᠬᠡᠯᠡᠨ ᠦ ᠰᠤᠷᠭᠠᠭᠤᠯᠢ᠂ ᠨᠣᠮ ᠤᠨ ᠰᠠᠩ᠂ ᠰᠣᠨᠢᠨ ᠰᠡᠳᠭᠦᠯ ᠭᠡᠳ ᠭᠠᠷᠭᠠᠵᠤ᠂ ᠬᠡᠯᠡ ᠪᠡᠨ ᠰᠤᠷᠬᠤ ᠬᠡᠷᠡᠭᠯᠡᠬᠦ ᠶᠠᠪᠤᠳᠠᠯ ᠳᠤ ᠰᠢᠭᠤᠳ ᠦᠢᠯᠡᠴᠢᠯᠡᠭᠦᠯᠵᠦ ᠪᠣᠯᠣᠨᠠ᠃ ᠰᠦᠯᠵᠢᠶᠡ ᠪᠡᠷ ᠬᠢᠵᠦ ᠪᠣᠯᠬᠤ ᠠᠵᠢᠯ ᠦᠢ ᠣᠯᠠᠨ ᠪᠠᠢᠭᠠ ᠶᠢ ᠶᠠᠪᠤᠭᠠᠨ ᠳᠠᠭᠠᠨ ᠪᠢᠳᠡ ᠤᠯᠠᠮ ᠤᠬᠠᠭᠠᠷᠠᠨᠠ᠃ ᠮᠠᠨ ᠤ ᠬᠢᠨ ᠴᠢᠳᠠᠳᠠᠭ ᠦᠭᠡᠢ᠂ ᠪᠦᠲᠦᠭᠡᠳᠡᠭ ᠦᠭᠡᠢ ᠶᠤᠮ ᠭᠡᠵᠦ ᠣᠯᠠᠨ ᠳᠠᠭᠠᠨ ᠳ᠋ᠦᠩ ᠲᠠᠯᠪᠢᠬᠤ ᠶᠢ ᠪᠢᠲᠡᠭᠡᠢ ᠶᠠᠭᠠᠷᠠᠶᠠ᠃ ᠦᠴᠦᠬᠡᠨ ᠨᠢᠭᠡ ᠠᠯᠬᠤᠮ ᠴᠤ ᠭᠡᠰᠡᠨ ᠠᠬᠢᠵᠤ ᠦᠵᠡᠶᠡ᠃ ᠡᠨᠡ ᠲᠤᠬᠠᠢ ᠶᠠᠷᠢᠶᠠ ᠬᠡᠯᠡᠯᠴᠡᠭᠡ ᠦᠷᠨᠢᠭᠦᠯᠦᠶᠡ᠃ ᠰᠦᠯᠵᠢᠶᠡ ᠶᠢ ᠪᠣᠰᠣᠭᠠ ᠪᠢᠴᠢᠭ ᠢᠶᠡᠷ ᠠᠷᠠᠢ ᠠᠮᠠᠷᠬᠠᠨ ᠬᠡᠷᠡᠭᠯᠡᠬᠦ ᠶᠢᠨ ᠲᠥᠯᠥᠭᠡ ᠰᠠᠨᠠᠭᠠᠴᠢᠯᠠᠵᠤ ᠪᠠᠢᠨᠠ ᠭᠡᠬᠦ ᠳᠦ ᠪᠣᠯᠬᠤ ᠶᠤᠮ᠃ ᠥᠭᠡᠷᠡ ᠪᠢᠴᠢᠭ ᠢᠶᠡᠷ ᠪᠣᠯFACEBOOK ᠡᠨᠡ ᠲᠡᠷᠡ ᠪᠡᠷ ᠬᠠᠷᠢᠯᠴᠠᠵᠤ ᠪᠣᠯᠣᠨᠠ ᠯᠠ ᠳ᠋ᠠ᠃ ᠪᠢᠳᠡᠨ ᠦ ᠣᠨᠴᠠᠭᠠᠢ ᠬᠡᠷᠡᠭᠴᠡᠭᠡ- ᠮᠣᠩᠭᠣᠯ ᠰᠦᠯᠵᠢᠶᠡ᠂ ᠮᠣᠩᠭᠣᠯ ᠰᠦᠯᠵᠢᠶᠡ︕ ᠬᠠᠷᠢᠯᠴᠠᠵᠤ ᠪᠣᠯᠳᠠᠭ᠂ ᠨᠡᠬᠡᠭᠡᠯᠲᠡ ᠲᠡᠢ ᠮᠣᠩᠭᠣᠯ ᠰᠦᠯᠵᠢᠶᠡ︕
ᠡᠨᠳᠡ ᠶᠠᠷᠢᠭᠰᠠᠨ ᠵᠣᠷᠢᠯᠲᠠ ᠶᠢ ᠣᠢᠯᠠᠭᠠᠭᠰᠠᠨ ᠡᠷᠬᠢᠮ ᠲᠠ᠂ ᠨᠠᠢᠵᠠ ᠨᠦᠬᠦᠳ ᠲᠡᠬᠡᠨ ᠳᠠᠮᠵᠢᠭᠤᠯᠤᠨ ᠶᠠᠷᠢᠵᠤ᠂ ᠳᠡᠯᠭᠡᠷᠡᠭᠦᠯᠦᠨ ᠲᠠᠢᠯᠪᠤᠷᠢᠯᠠᠵᠤ᠂ ᠰᠢᠨᠡ ᠰᠠᠨᠠᠭᠠ ᠰᠡᠳᠦᠯ ᠢᠶᠡᠷ ᠢᠶᠡᠨ ᠪᠠᠶᠠᠵᠢᠭᠤᠯᠵᠤ᠂ ᠳᠡᠮ ᠦᠵᠡᠭᠦᠯᠬᠦ ᠪᠣᠯᠣᠨᠠ ᠭᠡᠳᠡᠭ ᠲᠦ ᠨᠠᠢᠳᠠᠵᠤ ᠪᠠᠢᠨᠠ᠃
ᠲᠣᠳᠣᠷᠬᠠᠢᠯᠠᠯᠲᠠ᠄ ᠳᠡᠭᠡᠷᠡᠬᠢ ᠪᠣᠯ ᠨᠢᠭᠡᠨ ᠨᠠᠰᠤ ᠪᠠᠷ ᠢᠶᠠᠨ ᠡᠮᠦᠨᠡᠲᠦ ᠮᠣᠩᠭᠣᠯᠴᠤᠳ ᠤᠨ ᠢᠶᠠᠨ ᠲᠥᠯᠥᠭᠡ ᠪᠣᠳᠣᠨ ᠰᠡᠳᠬᠢᠵᠦ᠂ ᠬᠢᠴᠢᠶᠡᠨ ᠵᠢᠳᠬᠦᠭᠰᠡᠭᠡᠷ ᠢᠷᠡᠭᠰᠡᠨ ᠨᠢᠭᠡᠨ ᠪᠣᠭᠣᠷᠤᠯ ᠤᠨ ᠰᠠᠨᠠᠭᠠᠴᠢᠯᠠᠭᠠ ᠪᠣᠯᠬᠣ ᠶᠤᠮ᠃ ᠤᠩᠰᠢᠭᠴᠢ ᠲᠠ ᠪᠦᠬᠦᠨ ᠦ ᠪᠣᠯᠭᠣᠭᠠᠨ ᠲᠤᠩᠭᠠᠬᠤ ᠪᠣᠯᠣᠨᠠ ᠭᠡᠳᠡᠭ ᠲᠦ ᠢᠲᠡᠭᠡᠵᠦ ᠪᠣᠢ᠃
＜＜ᠡᠮᠦᠨᠡᠲᠦ ᠮᠣᠩᠭᠣᠯ ᠤᠨ ᠠᠰᠠᠭᠤᠳᠠᠯ --- ᠡᠮᠦᠨᠡᠲᠦ ᠮᠣᠩᠭᠣᠯ ᠳᠤ ᠣᠳᠣ ᠶᠠᠭ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠪᠤᠢ＞＞ ᠬᠤᠷᠠᠯ ᠤᠨ ᠮᠡᠳᠡᠭᠳᠡᠯ 
《ᠮᠢᠨᠦ ᠮᠡᠳᠡᠬᠦ ᠡᠮᠦᠨᠡᠲᠦ ᠮᠣᠩᠭᠣᠯ》 ᠮᠣᠩᠭᠣᠯ ᠪᠢᠴᠢᠭ ᠦᠨ ᠡᠸᠰᠰᠸ ᠪᠢᠴᠢᠯᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠤ ᠱᠠᠩᠨᠠᠯ ᠭᠠᠷᠳᠠᠭᠤᠯᠬᠤ ᠶᠣᠰᠣᠯᠠᠯ ᠪᠣᠯᠪᠠ