《 ᠠᠩᠬᠠᠳᠤᠭᠠᠷ ᠤᠳᠠᠭᠠᠨ ᠤ ᠠᠷᠢᠽᠠᠸᠠ ᠶᠦᠮᠠ ᠲᠠᠢ ᠬᠠᠮᠲᠤ ᠳᠠᠭᠠᠨ ᠰᠤᠷᠤᠯᠴᠠᠬᠤ ᠬᠤᠷᠠᠯ ᠁ ᠣᠢᠭᠤᠷ᠂ ᠲᠥᠪᠡᠳ᠂ ᠡᠮᠦᠨᠡᠲᠦ ᠮᠣᠩᠭᠣᠯ᠂ ᠬᠣᠩᠺᠣᠩ ᠳᠤ ᠪᠣᠯᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠤᠳ 》 ᠰᠸᠮᠢᠨᠠᠷ ᠨᠢ 5 ᠳ᠋ᠤᠭᠠᠷ ᠰᠠᠷᠠ ᠶᠢᠨ 21 ᠦ ᠡᠳᠦᠷ ᠣᠣᠰᠠᠺᠠ ᠶᠢᠨ ᠰᠦᠶ᠋ᠢᠲᠠ ᠬᠣᠲᠠᠨ ᠳᠤ ᠪᠣᠯᠵᠤ ᠥᠩᠭᠡᠷᠡᠪᠡ᠃
ᠬᠤᠷᠠᠯ ᠢ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠴᠢ ᠰᠦᠶ᠋ᠢᠲ᠋ᠠ ᠬᠣᠲᠠ ᠶᠢᠨ ᠫᠠᠷᠯᠠᠮᠸᠨᠲ ᠤᠨ ᠭᠡᠰᠢᠭᠦᠨ ᠠᠷᠢᠽᠠᠸᠠ ᠶᠦᠮᠠ ᠪᠠᠷ ᠣᠷᠣᠨ ᠨᠤᠲᠤᠭ ᠲᠤ ᠡᠢᠮᠦᠷᠬᠦ ᠬᠦᠮᠦᠨ ᠦ ᠡᠷᠬᠡ ᠪᠡᠷ ᠰᠡᠳᠦᠪᠯᠡᠭᠰᠡᠨ ᠰᠸᠮᠢᠨᠠᠷ ᠢ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠪᠠᠢᠭᠠ ᠰᠢᠯᠲᠠᠭᠠᠨ ᠢᠶᠠᠨ ᠲᠣᠳᠤᠷᠬᠠᠢᠯᠠᠬᠤ ᠳᠠᠭᠠᠨ 《 ᠬᠦᠮᠦᠨ ᠦ ᠡᠷᠬᠡ ᠶᠢᠨ ᠠᠰᠠᠭᠤᠳᠠᠯ ᠪᠣᠯ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠦ ᠬᠠᠮᠲᠤ ᠶᠢᠨ ᠲᠠᠨᠢᠯᠲᠠ ᠪᠣᠯᠬᠤ ᠪᠦᠭᠡᠳ ᠮᠠᠨ ᠤ ᠶᠠᠫᠣᠨᠴᠤᠳ ᠤᠨ ᠪᠣᠳᠤᠵᠤ ᠣᠯᠬᠤ ᠦᠭᠡᠢ᠂ ᠰᠠᠨᠠᠭᠠᠨ ᠳᠤ ᠪᠠᠭᠲᠠᠬᠤ ᠦᠭᠡᠢ ᠬᠦᠮᠦᠨ ᠦ ᠡᠷᠬᠡ ᠶᠢᠨ ᠨᠣᠴᠢᠲᠠᠢ ᠵᠦᠷᠢᠴᠡᠭᠳᠡᠯ ᠨᠢ ᠦᠨᠦᠳᠦᠷ ᠦᠨ ᠠᠽᠢᠶᠠ ᠳᠤ ᠡᠳᠦᠷ ᠲᠣᠲᠤᠮ ᠡᠭᠦᠰᠴᠦ ᠪᠣᠢ᠂ ᠲᠤᠰ ᠤᠳᠠᠭᠠᠨ ᠤ ᠣᠷᠣᠰ ᠤᠨ ᠦᠺᠷᠡᠢᠨ ᠳᠦ ᠵᠡᠪᠰᠡᠭᠲᠦ ᠲᠦᠷᠢᠮᠡᠬᠡᠢᠯᠡᠯ ᠬᠢᠵᠦ ᠪᠠᠢᠭᠠ ᠠᠰᠠᠭᠤᠳᠠᠯ ᠴᠤ ᠭᠡᠰᠡᠨ ᠪᠢᠳᠡᠨ ᠢ ᠣᠯᠠᠨ ᠵᠦᠢᠯ ᠪᠣᠳᠣᠵᠤ᠂ ᠪᠡᠯᠡᠳᠬᠦ ᠴᠢᠬᠤᠯᠠᠲᠠᠢ ᠭᠡᠰᠡᠨ ᠢ ᠦᠭᠦᠯᠡᠵᠦ ᠪᠣᠢ 》 ᠭᠡᠵᠡᠢ᠃
ᠲᠣᠰ ᠰᠸᠮᠢᠨᠠᠷ ᠲᠤ ᠭᠣᠣᠯ ᠢᠯᠡᠳᠭᠡᠯ ᠬᠢᠭᠰᠡᠨ ᠨᠢ᠂ ᠲᠥᠪᠡᠳ ᠦᠨ ᠷᠢᠨᠴᠢᠨ᠂ ᠡᠮᠦᠨᠡᠲᠦ ᠮᠣᠩᠭᠣᠯ ᠤᠨ ᠠᠷᠴᠠ ᠪᠣᠯᠣᠨ ᠬᠣᠩᠺᠣᠩ ᠤᠨ ᠺᠦᠷᠢᠰ ᠭᠤᠷᠪᠠ ᠪᠠᠢᠯᠠ᠃ ᠷᠢᠨᠴᠢᠨ ᠭᠤᠸᠠᠢ 《 ᠲᠥᠪᠡᠳ ᠡᠬᠡ ᠣᠷᠣᠨ ᠢᠶᠠᠨ ᠠᠯᠳᠠᠵᠤ ᠬᠠᠷᠢ ᠣᠷᠣᠨ ᠢᠶᠠᠷ ᠲᠡᠨᠦᠭᠦᠴᠢᠯᠡᠵᠦ ᠪᠠᠢᠭᠠ ᠬᠡᠳᠦᠢ ᠴᠤ ᠪᠢᠳᠡᠨ ᠦ ᠰᠡᠳᠭᠢᠯ ᠳᠦ ᠡᠬᠡ ᠣᠷᠣᠨ ᠮᠠᠨᠢ ᠮᠥᠩᠬᠡ ᠣᠷᠣᠰᠢᠳᠠᠭ 》 ᠭᠡᠰᠡᠨ ᠪᠣᠯ᠂ ᠺᠦᠷᠢᠰ ᠡᠴᠡ 《 ᠬᠣᠩᠺᠣᠩ ᠨᠢ ᠶᠠᠪᠤᠬᠤ ᠲᠣᠳᠤᠮ ᠡᠷᠬᠡ ᠴᠢᠯᠦᠭᠡ ᠪᠡᠨ ᠠᠯᠳᠠᠵᠤ ᠪᠠᠢᠭᠠ ᠥᠨᠥᠳᠥᠷ᠂ ᠶᠠᠫᠣᠨ ᠤ ᠬᠦᠮᠦᠨ ᠦ ᠡᠷᠬᠡ ᠶᠢᠨ ᠲᠥᠯᠥᠭᠡ ᠢᠯᠡᠭᠦᠦ ᠶᠠᠷᠢᠵᠤ ᠬᠦᠳᠡᠯᠵᠦ ᠪᠠᠢᠬᠤ ᠶᠢ ᠬᠦᠰᠡᠨᠡ 》 ᠭᠡᠵᠡᠢ᠃
ᠡᠮᠦᠨᠡᠲᠦ ᠮᠣᠩᠭᠣᠯ ᠤᠨ ᠶᠡᠬᠡ ᠬᠤᠷᠠᠯᠳᠠᠢ ᠶᠢᠨ ᠶᠡᠷᠦᠩᠬᠡᠢ ᠨᠠᠷᠢᠨ ᠪᠢᠴᠢᠭ ᠦᠨ ᠳᠠᠷᠤᠭᠠ ᠳ᠋ᠣᠺᠲ᠋ᠣᠷ ᠠᠷᠴᠠ 《 ᠡᠮᠦᠨᠡᠲᠦ ᠮᠣᠩᠭᠣᠯ ᠳᠤ ᠪᠣᠯᠵᠤ ᠪᠠᠢᠭᠠ ᠤᠴᠢᠷ ᠁ ᠪᠠᠢᠭᠠᠯᠢ᠂ ᠬᠦᠮᠦᠨ ᠦ ᠡᠷᠬᠡ᠂ ᠬᠡᠯᠡ ᠁ ᠰᠡᠳᠦᠪ ᠢᠶᠡᠷ ᠢᠯᠡᠳᠭᠡᠯ ᠬᠢᠵᠡᠢ᠃ ᠲᠡᠷᠡ ᠪᠡᠷ ᠡᠮᠦᠨᠡᠲᠦ ᠮᠣᠩᠭᠣᠯ ᠭᠡᠳᠡᠭ ᠦᠨ ᠰᠢᠯᠲᠠᠭᠠᠨ ᠢ ᠭᠠᠵᠠᠷ ᠤᠨ ᠵᠢᠷᠤᠭ᠂ ᠲᠡᠦᠬᠡ ᠵᠡᠷᠭᠡ ᠪᠠᠷᠢᠮᠲᠠ ᠪᠠᠷ ᠲᠣᠪᠴᠢᠬᠠᠨ ᠥᠭᠥᠯᠡᠭᠰᠡᠨ ᠦ ᠪᠡᠨ ᠳᠠᠷᠠᠭᠠ᠂ ᠪᠠᠢᠭᠠᠯᠢ ᠣᠷᠴᠢᠨ ᠤ ᠲᠠᠯᠬᠢᠭᠳᠠᠨ ᠴᠦᠯᠵᠢᠵᠦ ᠪᠠᠢᠭᠠ ᠪᠠᠢᠳᠠᠯ᠂ ᠰᠢᠯᠲᠠᠭᠠᠨ ᠵᠢᠴᠢ ᠲᠡᠭᠦᠨ ᠦ ᠦᠷᠡ ᠳᠠᠭᠠᠪᠤᠷᠢ ᠵᠡᠷᠭᠡ ᠶᠢ ᠵᠢᠷᠤᠭ ᠦᠵᠡᠭᠦᠯᠦᠨ ᠲᠣᠭᠠᠴᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠬᠦᠮᠦᠨ ᠦ ᠡᠷᠬᠡ ᠶᠢᠨ ᠨᠣᠴᠢᠲᠠᠢ ᠵᠦᠷᠢᠴᠡᠭᠳᠡᠵᠦ ᠪᠠᠢᠭᠠ ᠪᠠᠢᠳᠠᠯ᠂ ᠵᠢᠴᠢ ᠪᠠᠭᠠ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠡᠦᠬᠡᠳ ᠲᠦ ᠬᠢᠲᠠᠳ ᠢᠶᠠᠷ ᠭᠣᠣᠯᠲᠠᠢ ᠬᠢᠴᠢᠶᠡᠯᠯᠡᠬᠦ ᠪᠣᠯᠣᠭᠰᠠᠨ ᠪᠠᠢᠳᠠᠯ ᠵᠡᠷᠭᠡ ᠬᠢᠲᠠᠳ ᠤᠨ ᠵᠠᠰᠠᠭ ᠤᠨ ᠤᠰᠠᠳᠬᠤ ᠪᠣᠳᠣᠯᠭᠠ ᠬᠦᠴᠦᠲᠡᠢ ᠶᠠᠪᠤᠭᠳᠠᠵᠤ ᠪᠠᠢᠭᠠ ᠶᠢ ᠲᠠᠨᠢᠯᠴᠠᠭᠤᠯᠵᠠᠢ᠃
ᠰᠸᠮᠢᠨᠠᠷ ᠳᠤ ᠤᠤᠯ ᠤᠨ ᠲᠥᠰᠥᠭᠡᠯᠡᠵᠦ ᠪᠠᠢᠭᠰᠠᠨ ᠠᠴᠠ ᠪᠠᠨ ᠲᠠᠬᠢᠨ ᠢᠶᠠᠷ ᠢᠯᠡᠭᠦᠦ ᠵᠠᠭᠤ ᠭᠠᠷᠤᠢ ᠬᠦᠮᠦᠨ ᠢᠷᠡᠭᠰᠡᠨ ᠪᠥᠭᠡᠳ ᠾᠢᠷᠠᠭᠠᠲ᠋ᠠ᠂ ᠮᠢᠨᠣᠣ ᠵᠡᠷᠭᠡ ᠬᠣᠲᠠ ᠶᠢᠨ ᠫᠠᠷᠯᠠᠮᠸᠨᠲ ᠬᠡᠰᠡᠭ ᠭᠡᠰᠢᠭᠦᠳ ᠴᠤ ᠣᠷᠣᠯᠴᠠᠭᠰᠠᠨ ᠪᠠᠢᠨᠠ᠃ ᠪᠠᠰᠠ ᠨᠡᠷᠡᠲᠦ ᠰᠡᠳᠭᠦᠯᠴᠢ ᠷᠣᠪᠠᠲ᠋ᠣ᠋ ᠡᠸ᠋ᠷᠣᠳᠢᠷᠢᠳᠴᠢ ( ᠠᠮᠧᠷᠢᠺᠠ ) ᠴᠤ ᠬᠦᠷᠦᠯᠴᠡᠨ ᠢᠷᠡᠵᠦ ᠦᠭᠡ ᠶᠠᠷᠢᠭᠰᠠᠨ ᠪᠠᠢᠨᠠ᠃ ᠲᠡᠷᠡ ᠬᠡᠯᠡᠬᠦ ᠳᠡᠬᠡᠨ 《 ᠥᠨᠥᠳᠥᠷ ᠮᠠᠰᠢ ᠤᠳᠬᠠ ᠠᠭᠤᠯᠭᠠ ᠲᠠᠢ ᠬᠤᠷᠠᠯ ᠪᠣᠯᠣᠯᠠ᠂ ᠪᠢ ᠴᠤ ᠥᠪᠡᠷ ᠢ ᠪᠡᠨ ᠨᠡᠯᠢᠶᠡᠳ ᠰᠠᠢᠨ ᠰᠤᠷᠤᠯᠴᠠᠵᠤ ᠪᠣᠢ ᠭᠡᠵᠦ ᠰᠠᠨᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠥᠨᠥᠳᠥᠷ ᠦᠨ ᠢᠯᠡᠳᠭᠡᠯ ᠦᠳ ᠢ ᠰᠣᠨᠣᠰᠤᠭᠠᠳ ᠪᠠᠰᠠ ᠪᠣᠯᠣᠭᠠ ᠦᠭᠡᠢ ᠪᠠᠢᠨᠠ ᠭᠡᠳᠡᠭ ᠢᠶᠡᠨ ᠮᠡᠳᠡᠯᠡ᠃ ᠮᠠᠰᠢ ᠣᠯᠠᠨ ᠵᠦᠢᠯ ᠣᠢᠯᠠᠭᠠᠨ ᠮᠡᠳᠡᠭᠰᠡᠨ ᠪᠠᠢᠨᠠ᠃ ᠦᠨᠡᠨᠳᠡᠭᠡᠨ ᠶᠠᠫᠣᠨ ᠤ ᠬᠤᠪᠢ ᠳᠤ ᠠᠪᠴᠤ ᠦᠵᠡᠭᠰᠡᠨ ᠴᠤ ᠡᠨᠡ ᠪᠣᠯ ᠬᠠᠮᠢᠶᠠ ᠦᠭᠡᠢ ᠤᠴᠢᠷ ᠣᠭᠲᠣᠬᠠᠨ ᠴᠤ ᠪᠢᠰᠢ᠃ ᠠᠶᠤᠯᠭᠦᠢ ᠶᠢᠨ ᠪᠠᠢᠳᠠᠯ᠂ ᠡᠳ᠋ ᠦᠨ ᠵᠠᠰᠠᠭ ᠤᠨ ᠠᠰᠠᠭᠤᠳᠠᠯ ᠵᠡᠷᠭᠡ ᠶᠢ ᠭᠢᠣᠫᠣᠯᠢᠲ᠋ᠢᠺ ( GEOPOIITICS ) ᠦᠨ ᠡᠭᠦᠳᠡᠨ ᠬᠠᠷᠠᠬᠤ ᠳᠦ ᠬᠢᠷᠢ ᠴᠢᠬᠤᠯᠠ ᠪᠣᠯᠬᠤ ᠨᠢ ᠣᠢᠯᠠᠭᠠᠮᠵᠢᠲᠠᠢ᠃ ᠬᠢᠲᠠᠳ ᠲᠤ ᠶᠠᠷᠢᠶᠠ ᠬᠡᠯᠡᠯᠴᠡᠭᠡᠨ ᠦ ᠡᠷᠬᠡ ᠴᠢᠯᠦᠭᠡ ᠭᠡᠵᠦ ᠪᠠᠢᠬᠤ ᠦᠭᠡᠢ ᠲᠤᠯᠠ ᠪᠦᠬᠦ ᠵᠦᠢᠯ ᠳᠦ ᠮᠠᠷᠭᠤᠬᠤ᠂ ᠨᠢᠴᠤᠭᠠᠬᠤ ᠪᠣᠯᠣᠮᠵᠢ ᠦᠭᠡᠢ ᠪᠣᠯᠣᠨᠠ᠂ ᠡᠨᠡ ᠨᠢ ᠮᠠᠰᠢ ᠠᠶᠤᠯᠲᠠᠢ ᠵᠦᠢᠯ ᠦ ᠢ ᠪᠣᠢ ᠪᠣᠯᠭᠠᠨᠠ 》 ᠭᠡᠵᠡᠢ᠃
ᠬᠠᠮᠤᠭ ᠰᠡᠭᠦᠯ ᠳᠦ ᠨᠢ ᠲᠤᠰ ᠤᠳᠠᠭᠠᠨ ᠤ ᠰᠸᠮᠢᠨᠠᠷ ᠢ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠰᠠᠨ ᠠᠷᠢᠽᠠᠸᠠ ᠶᠦᠮᠠ ᠠᠴᠠ 《 ᠶᠠᠫᠣᠨ ᠤᠯᠠᠮ ᠢᠯᠡᠭᠦᠦ ᠬᠦᠴᠦᠷᠬᠡᠭ ᠪᠣᠯᠵᠤ᠂ ᠠᠽᠢᠶᠠ ᠶᠢᠨ ᠠᠷᠠᠳᠴᠢᠯᠠᠯ ᠡᠩᠬᠡ ᠲᠠᠢᠪᠤᠩ ᠤᠨ ᠳᠠᠭᠠᠭᠤᠯᠤᠭᠴᠢ ᠪᠣᠯᠣᠮᠠᠷ ᠪᠠᠢᠨᠠ᠃ ᠬᠢᠲᠠᠳ ᠲᠤ ᠳᠠᠷᠤᠯᠠᠭᠳᠠᠵᠤ ᠪᠠᠢᠭᠠ ᠦᠨᠳᠦᠰᠦᠲᠡᠨ ᠦ ᠬᠦᠮᠦᠨ ᠦ ᠡᠷᠬᠡ ᠶᠢᠨ ᠠᠰᠠᠭᠤᠳᠠᠯ ᠢ ᠦᠷᠭᠦᠯᠵᠢᠯᠡᠨ ᠰᠤᠷᠤᠯᠴᠠᠬᠤ ᠪᠣᠯᠣᠨᠠ 》 ᠭᠡᠪᠡ᠃
2022 ᠣᠨ ᠤ 5 ᠰᠠᠷᠠ ᠶᠢᠨ 22 ᠦ ᠡᠳᠦᠷ
ᠲᠤᠯᠭᠠ ᠮᠡᠳᠡᠭᠡᠯᠡᠪᠡ
